Plantun de Prouvènço

Pèr coumpara dos planto d'encò nostre

Erysimum nevadense & Oenothera glazioviana

Erysimum nevadense

Brassicaceae Cruciferae

Nom en français : Vélar de Provence.

Descripcioun :
Aquesto girouflèio trachis dins li roucaio, tepiero seco e roucas de colo e de basso mountagno ounte èi coumuno. Li fueio soun longo e estrecho e li flour jauno. Mounte pas mai qu'aperaqui 1000 m ; s'atrobo pièi sa cousino, la girouflèio-de-Souïsso, Erysimum rhaeticum, qu'a de petalo mai larjo (5 à 10 mm alor que Erysimum nevadense fan pas mai que 5 mm en generau). Aquesto peréu fai pas de rejit esterlo à la flouresoun qu'es uno planto que trachis sus dos annado. Coumpara emé la girouflèio-de-Souïsso.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 60(80) cm
Fueio : alterno
Tipe bioulougico : Emicriptoufite
Cicle bioulougico : Renadivo mounoucarpico

Gènre : Erysimum
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 0 à 1800 m
Aparado : Noun

Liò : Colo - Basso mountagno - Roucaio - Tepiero seco
Estànci : Mesoumediterran à Mountagnard
Couroulougi : Pancaro entresigna
Ref. sc. : Erysimum nevadense Reut., 1855

Rougeto(di-gràndi-flour)

Oenothera glazioviana

Onagraceae

Autre noum : Erbo-dis-ase.

Nom en français : Onagre à grandes fleurs.

Descripcioun :
La rougeto-di-gràndi-flour trachis majamen dins lou limas en ribo d'aigo ounte flouris au printèms, es à dire mai d'ouro que si cousino (coume Oenothera biennis que flouris en estiéu). Se recounèis eisadamen à si petalo mai grando (45 mm), à si boutoun mai prim, sa coulour mai roujo e subretout à soun estigmate en crous, pu long que lis estamino (fotò).

Usanço :
Soun óurigino s'atrouvarié dins un mestissage (ibridacioun) dins un jardin en Éuropo e se sarié espandido dins lou mounde. A li mémi prouprieta que la rougeto, Oenothera biennis.